កណ្តាល៖ មានការភ្ញាក់ផ្អើល និងព្រួយបារម្ភជាខ្លាំងពីសំណាក់ប្រជាពលរដ្ឋ បន្ទាប់ពីឃើញសកម្មភាពរថយន្តធុនធំជាច្រើនគ្រឿង បាននិងកំពុងសម្រុកដឹកដីចាក់លុបបិទផ្ជិតផ្លូវទឹកព្រែក ស្ថិតនៅភូមិព្រែកត្រែង២ ឃុំសំរោងធំ ស្រុកកៀនស្វាយ ខេត្តកណ្តាល កាលពីព្រឹកថ្ងៃទី១៩ ខែកក្កដា ឆ្នាំ២០២៦។
ករណីនេះបានធ្វើឱ្យសាធារណជនដាក់ការសង្ស័យ និងស្នើឱ្យមានការត្រួតពិនិត្យផ្លូវច្បាប់ជាបន្ទាន់។

ការបំភ្លឺពីភាគីអាជ្ញាធរមូលដ្ឋានពាក់ព័ន្ធនឹងករណីខាងលើនេះ លោក ជ័យ សំអាន គឺជាមេឃុំសំរោងធំ ស្រុកកៀនស្វាយ ខេត្តកណ្តាលបានធ្វើការបំភ្លឺប្រាប់ភ្នាក់ងារសារព័ត៌មានថា សកម្មភាពចាក់ដីខាងលើនេះ គឺធ្វើឡើងនៅលើផ្ទៃដីដែលមាន ប្លង់កម្មសិទ្ធិស្របច្បាប់ត្រឹមត្រូវ របស់ម្ចាស់ដីឈ្មោះ សុខ យាង តែប៉ុណ្ណោះ មិនមែនជាការទន្ទ្រានយកដីសាធារណៈរបស់រដ្ឋឡើយ។ការអះអាង និងការព្រួយបារម្ភរបស់ប្រជាពលរដ្ឋផ្ទុយទៅវិញ ប្រជាពលរដ្ឋដែលរស់នៅក្នុងមូលដ្ឋានតាំងពីដូនតាមក បានលើកឡើងថា ទីតាំងដែលកំពុងចាក់ដីនោះ គឺដីព្រែកធម្មជាតិដែលធ្លាប់តែជាផ្លូវទឹករំដោះតាំងពីយូរយារណាស់មកហើយ។

ក្រុមពលរដ្ឋ និងសារព័ត៌មានក្នុងស្រុកបានដាក់ការសង្ស័យថា សកម្មភាពចាក់ដីរបស់ឈ្មោះ សុខ យាង ខាងលើ អាចមានការ ចាក់រំលោភបំពានហួសពីដែនកំណត់នៃប្លង់កម្មសិទ្ធិ បិទផ្លូវទឹកទាំងស្រុង ដែលអាចបង្កផលប៉ះពាល់ជាអត្ថាហេតុដល់ប្រព័ន្ធរំដោះទឹក ព្រមទាំងហន្តរាយដល់ស្ពានថ្នល់នៅក្បែរនោះ។សំណូមពរស្វែងរកការពិត និងតម្លាភាពដើម្បីធានាបាននូវភាពត្រឹមត្រូវ តម្លាភាព និងការពារផលប្រយោជន៍សាធារណៈ ប្រជាពលរដ្ឋ និងអ្នកសារព័ត៌មានសូមគោរពស្នើសុំយ៉ាងទទូចដល់ លោក ឡូវ សុខសាន អភិបាលនៃគណៈអភិបាលស្រុកកៀនស្វាយ មេត្តាចាត់មន្ត្រីជំនាញក្រោមឱវាទ ចុះត្រួតពិនិត្យ និងវាស់វែងផ្ទាត់ផ្ទៀងនិយាមកាទីតាំងជាក់ស្តែងជាបន្ទាន់។

ទន្ទឹមនឹងនេះ ស្ថាប័ន និងមន្ទីរជំនាញពាក់ព័ន្ធនៃខេត្តកណ្តាល ក៏ត្រូវបានស្នើឱ្យចូលរួមពិនិត្យលើករណីនេះផងដែរ រួមមាន៖មន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តកណ្តាល៖ ផ្ទៀងផ្ទាត់និងដកស្រង់និយាមកាប្លង់ដី ដើម្បីដឹងថាការចាក់ដីរបស់ឈ្មោះ សុខ យាង នេះលេចចូលដីព្រែករដ្ឋឬទេ។

មន្ទីរធនធានទឹក និងឧតុនិយម ខេត្តកណ្តាល៖ វាយតម្លៃលើផលប៉ះពាល់ផ្លូវទឹក មិនឱ្យមានការបិទច្រកទឹកហូរធម្មជាតិ។

មន្ទីរសាធារណការ និងដឹកជញ្ជូន ខេត្តកណ្តាល៖ ពិនិត្យផលប៉ះពាល់លើហេដ្ឋារចនាសម្ព័ន្ធស្ពាន និងថ្នល់ជុំវិញ។

មន្ទីរបរិស្ថាន ខេត្តកណ្តាល៖ ពិនិត្យលើផលប៉ះពាល់បរិស្ថាន និងប្រព័ន្ធអេកូឡូស៊ីជុំវិញ។សេចក្តីរាយការណ៍បន្ថែមជុំវិញលទ្ធផលនៃការចុះពិនិត្យរបស់មន្ត្រីជំនាញ តាមបទបញ្ជារបស់រដ្ឋបាលស្រុកកៀនស្វាយ នឹងត្រូវបានផ្សព្វផ្សាយជូនជាបន្តបន្ទាប់ទៀត នៅពេលទទួលបានព័ត៌មានផ្លូវការជាបន្ត។