ខេត្តពោធិ៍សាត់៖ លោកឧត្តមសេនីយ៍ទោ ស ថេង ស្នងការនគរបាលខេត្តពោធិ៍សាត់ បានដឹកនាំក្រុមការងារចុះត្រួតពិនិត្យ និងតាមដានការអនុវត្តការងារនៅប៉ុស្តិ៍នគរបាលរដ្ឋបាលចំនួន២ រួមមាន ប៉ុស្តិ៍នគរបាលរដ្ឋបាលក្បាលត្រាច និងប៉ុស្តិ៍នគរបាលរដ្ឋបាលអន្សាចំបក់។

ក្នុងឱកាសចុះបំពេញបេសកកម្មនេះ លោកស្នងការបានត្រួតពិនិត្យលើស្ថានភាពកម្លាំងនគរបាលប្រចាំប៉ុស្តិ៍ របៀបរបបនៃការបំពេញការងារ ការផ្តល់សេវាសាធារណៈជូនប្រជាពលរដ្ឋ ការរក្សាសន្តិសុខ សណ្តាប់ធ្នាប់សាធារណៈ ព្រមទាំងការអនុវត្តតួនាទី និងភារកិច្ចប្រចាំថ្ងៃរបស់មន្ត្រីនគរបាល។

ជាមួយគ្នានេះ លោកឧត្តមសេនីយ៍ទោ ស ថេង ក៏បានស្តាប់របាយការណ៍ និងស្វែងយល់ពីស្ថានភាពជាក់ស្តែង ព្រមទាំងតម្រូវការចាំបាច់នានារបស់ប៉ុស្តិ៍នគរបាលរដ្ឋបាលនីមួយៗ ដើម្បីជាមូលដ្ឋានក្នុងការពង្រឹងសមត្ថភាពការងារ និងលើកកម្ពស់ប្រសិទ្ធភាពនៃការបម្រើប្រជាពលរដ្ឋឱ្យកាន់តែល្អប្រសើរឡើង។

លោកស្នងការបានណែនាំដល់កម្លាំងនគរបាលទាំងអស់ ឱ្យបន្តគោរពវិន័យកងកម្លាំង ពង្រឹងសាមគ្គីភាពផ្ទៃក្នុង បំពេញភារកិច្ចដោយការទទួលខុសត្រូវខ្ពស់ និងបម្រើប្រជាពលរដ្ឋប្រកបដោយភាពស្មោះត្រង់ តម្លាភាព និងវិជ្ជាជីវៈ ស្របតាមគោលនយោបាយរបស់ថ្នាក់ដឹកនាំ។